image

پەیامی کورد      ...    فەڕەنسا هاوكاری پزیشكی و كشت وكاڵی پێشکەشی هەڵەبجە دەكات

كۆنسووڵی فەڕەنسا لە هەرێمی كوردستان، لە سەردانێكیدا بۆ هەڵەبجە ڕایگەیاند، هەماهەنگی تەندرووستییان دەبێت و پێداویستی تەندرووستی بە نەخۆشخانەی بەركەوتووانی چەكی كیمیایی دەبەخشن. دەشڵێ، دەیانەوێت هەماهەنگی كشتوكاڵییان هەبێت و كۆمپانیاكانی فەڕەنسا بێننە هەڵەبجە.

ئازاد تۆفیق، پارێزگاری هەڵەبجە، لە كۆنگرە ڕۆژنامەوانیدا ڕایگەیاند : "لە ماوەی یەك ساڵدا كۆنسووڵی ووڵاتی فەڕەنسا دووەم سەردانیەتی بۆ هەڵەبجە، ئامانج لە سەردانەكەیشی، دوو خاڵە، یەكەم لە ڕووی تەندرووستییەوە چۆن هاوكاری بكەن، بە تایبەت بۆ نەخۆشخانەی بەركەوتووانی چەكی كیمیایی، دووهەم لە ڕووی كشتوكاڵییەوە كۆنسووڵی فەڕەنسا پێی باشە لەو هەماهەنگییەی حكوومەتی هەرێم و فەڕەنسا هەیانە لە ڕووی كشتوكاڵییەوە، هەڵەبجە تێیدا بەشدار بێت، كە بەرهەمی باشی كشت وكاڵی و باخداری هەیە".

ئۆلیڤیە دیكۆنتینیز، كۆنسووڵی فەڕەنسا ڕایگەیاند: "خۆشحاڵم سەردانی هەڵەبجە دەكەم، بۆ دوو مەبەستیش سەردانی هەڵەبجەم كردووە، یەكەم چۆن بتوانین هاوكاریی بەركەوتووانی چەكی كیمیایی بكەین، كە دەوڵەتی فەڕەنسا بەڵێنی داوە و وەزیری دەرەوەی فەڕەنساش لە سەردانەكەیدا بۆ هەولێر، باسی كردووە".

دیكۆنتینیز ووتیشی: "ئەمڕۆ سەردانی تەندرووستی هەڵەبجە دەكەم و لەگەڵ بەرپرسان و پزیشكانی هەڵەبجە كۆدەبمەوە، تا بزانین ئەوان چییان پێویستە و ئێمە بتوانین هەماهەنگی بكەین و هاوكارییەكە پێشكەش بە نەخۆشخانەی بەركەوتووانی چەكی كیمیایی بكەین".

كۆنسووڵی فەڕەنسا دەشڵێ:" هەڵەبجە پێگەیەكی گرنگی ئابووریی هەیە، بە تایبەتی لە ڕووی كشتوكاڵییەوە دەشتی شارەزوور خاكێكی بەپیتە، كاتێك هاتم لە ڕێ كێشەیەكم بۆ دروست بوو، دابەزیم و دەستم لەو خاكە دا، خواستی ئێمە ئەوەیە پەرە بە كشتوكاڵی هەڵەبجە بدرێت و كۆمپانیا فەڕەنسییەكان بێن لە بواری كشتوكاڵ و پیشەسازی كار بكەن".