image

PeyamaKurd - Bi dirûşma ‘Berê herkesê li Kurdistanê ye’ 11emîn Festîvala Filmên Kurdî a Berlînê sibe 14ê Cotmeha 2021an destpê dike û heta 20ê mehê berdewam bike.

Malpera Festîvala Filmên Kurdî a Berlînê ragihandiye, ji ber pandemiya vîrusa koronayê, îsal dê festîval bi riya online birêve biçe ku zêdetirî 40 belgefilm, filmên metrajdirêj, filmên ezmûnî, kurtefilm têne nîşandan.

Di bernameya 11emîn Festîvala Filmên Kurdî a Berlînê de hatiye gotin, “Me guhertoya xwe ya dawî ya festîvalê wekî çapa serhêl wergerand û em dixwazin îsal vê binesaziyê dîsa bikar bînin. Bi vî rengî em dikarin bigihîjin temaşevanek bi awayekî berfireh, bi taybet li herêma Kurdistanê de. Online-Pass wê ji 14 -ê Cotmeh 2021-an peyda bibe ûbi riyê wê hun dikarin bigihîje bernameya festîvalê de ya hilbijartî. Li ser platformek VOD ya zu bersivdar, hûn dikarin fîlimên di navbera smartphone, tablet û televîzyonê de bi keyfxweşî temeşe bikin. Bê guman, em awayên peredana yên herî gelemperî (Visa, PayPal) pêşkêş dikin.”

Festîvala Filmên Kurdî a Berlînê diyar kiriye ku fokûsa wan a îsal Başûrê Kurdistanê ye û tê gotin, “Festîvala Filmên Kurdî ya Berlînê îsal gera xwe ya 11emîn pêk tîne û em dê di vê edîsyona festîvalê da nêzîktir berê xwe bidinê ka di 20 salên dawî da li Kurdistana Başûr der barê sînemayê da çi pêk hatiye. Ev pirsyar bes hişyariyek e, eger ne, gelek tişt pêk hatine. Ligel heqîqetên siyasî yên her çar dewletên cîran jî, encamên şerê Iraqê li ser Başûrê Kurdistanê digihîne lûtkeyê û ev çend dibe wesîleya çîrokên seyr. Filmên kurdî yên li Kurdistana Başûr, bi taybet nêzîkî nearamiyeka global in û bi vî rengî nîşan didin ka jiyana medenî û rojane çawa tê raborandin.”

Festîvala Filmên Kurdî a Berlînê di sala 2002yan de dest pê kiriye û di sala 2020an de 10emîn salvegera xwe pîroz kir. Di berdewamiya salan da çalakiyên çandî di nava Festîvala Berlînê da bi cih bûn û êdî festîval ne tenê civakên kurd herwiha di nava sînemahez û gelên Berlînê da jî tê zanîn.

Bernameya festîvalê ji kurtefilm, belgefilm û filmên metrajdirêj pêk tê û hem karên derhênerên çar parçeyên Kurdistanê -Başûr, Rojhilat, Bakur, Rojava- û dîasporayê hem jî karên derhênerên Ewropî yên ku behsa babeta rastiyên kurdan dikin, di nava xwe da dihewîne. Çalakiyên mîna nîqaşên bi rêya panêlan, konsert û xwendinên cûr bi cûr, bernameya filman ya bi baldarî hatî hilbijartin, xurttir dikin. Ji sala 2018ê û vir ve, bi hevkariya Komeleya Yekîtiya Malbatên Kurd, YEKMALê, gelek filmên zarokan bûn perçeyeke bingehîn ya bernameya festîvalê. Dîsa, ji sala 2020ê û vir ve bername cih dide nêrînên hunermendên ciwan yên kurd yên videoyên hunerî çêdikin, û ew bûne perçeyeke bingehîn ya festîvalê.

Hûn dikarin ji vê lînkê  xwe bigihînin bernameya 11emîn Festîvala Filmên Kurdî a Berlînê…