image

PeyamaKurd – Li Herêma Kurdistanê ji destpêka sala 2021ê ve heta niha nêzîkî 300 şîrket û kompaniya li Hewlêrê hatine damezirandin.

Berpirsê tomarkirina kompaniya û şîrketan li wezareta bazirganî û pîşesaziya Kurdistanê, Piştîwan Wertî ragihand, îsal li Hewlêrê 289 kompaniyayên hundirîn û 10 jî yên biyanî hatine tomarkirin. 90 şîrketên xwemalî û biyanî jî hatine betalkirin.

Piştîwan Wertî ji BasNewsê re daye xuyakirin, li gorî sala borî rêjeya tomarkirin û damezirandina kompaniyayan baştir e. Bi giştî heta niha li Hewlêrê 16 hezar û 996 kompaniyayên xwemalî û du hezar û 402 jî kompaniyayên biyanî ne.

Berpirsê tomarkirina kompaniyayan da zanîn, ji ber vîrusa koronayê û kirîza darayî, sala borî rêjeya tomarkirina şîrketan baş nebû û got, li Herêma Kurdistanê herî zêde li Hewlêrê kompaniya hatine damezirandin û tomarkirin, bi taybet kompaniyayên biyanî.

Bi gotina wî berpirsê hikûmetê, sermiyana şîrketên biyanî ji milyonek dînar dest pê dike heta milyarek dînar diçe. Piraniya şîrketên xwemalî di warê bazirganiyê de kar dikin.