image

PeyamaKurd - Hêzên Sûriya Demokratîk (HSD) bi daxuyaniyekê ragihand ku hêzên wan di çarçoveya berevaniya rewa de êrîşî Artêşa Tirkiyê kirine û 7 leşkerên Tirkiyê hatine kuştin, herî kêm 3 jî birîndar bûne.

Li gorî daxuyaniya Navenda Ragihandinê ya Hêzên Sûriya Demokratîk (HSD) ya îro Pêncşemê, di çarçoveya mafê bersivdayina rewa de, dema dawî de HSDê 3 operasyon li ser sînorê bajarên Riha, Dîlok û Mêrdînê pêk anîne.

HSDê diyar kir, di operasyona yekem a li Rihayê de, 6 leşker hatine kuştin ku di nav wan de fermandarek û endamekî îstixbaratê hebûye û cebilxane jî hatiye teqandin.

Li gorî daxuyaniya HSDê di operasyona duyem a li Dîlokê de hejmara kuştiyan nehatiye piştrast kirin û operasyona sêyem jî li Mêrdînê bûye ku di encamê de leşkerek hatiye kuştin û 3 jî birîndar bûne.

Di daxuyaniya HSDê de hatiye gotin ku ew dê çalakiyên bersivdanê li dijî êrîşên Tirkiyê berdewam bikin.