image

PeyamaKurd - Berdevkê Fermandariya Giştî ya Artêşa Iraqê Yehya Resul li ser operasyonên Tirkiyê yên nav xaka Herêma Kurdistanê bi hinceta hebûna PKKê daxuyanî da û eşkere kir ku artêşa Tirkiyê heta kûrahiya 20 kîlometreyan ketiye nav xaka Iraqê.

Resûl ev yek wekî binpêkirina serweriyê û dagirkirina xaka Iraqê bi nav kir û wiha got:

“Ev yek li gorî lihevkirina her du aliyan, gelekî zêde ye. Artêşa Tirk hejmara baregehên xwe yên di nava herêma Kurdistanê de zêde kirine. Hatina ber bi pêş a dewleta Tirk ne rast e, divê Tirkiye rêzê li serweriya Iraq û welatên cîran bigire.”

Yehya Resûl diyar kir ku baweriya wan bi rêyên dîplomasiyê heye û diyar kir: “Ya ku îro li ser xaka Iraqê çêdibe, dagirkeriyeke mezin e. Dewleta Tirk qada hewayî ya Iraqê binpê kiriye, divê bi rêya sîstema parastina esmanî, ev yek were çareserkirin.”