PeyamaKurd – Koalîsyona Navdewletî ya li dijî DAIŞê ya hatiye avakirin, ji bo 9 şervanên HSDê yên di ketina helîkopterên li Duhokê de jiyana xwe ji dest dane, peyama sersaxiyê weşand.

Êvara 15ê Adarê, li bejahiya gundê Biryatê ya ser bi navçeya Çemankê ya navçeya Amêdî ya Duhokê, helîkopterek ket. Hat diyarkirin, 7 kesên di helîkopterê de jiyana xwe ji dest dane û cenazeyên wan rakirine Saziya Tipa Edlî.

Parêzgarê Duhokê Elî Teter ragihand, kesên di helîkopterê de PKKyî ne û helîkoptereke din jî ji cihê bûyerê dûr ketiye.

Lê Hêzên Sûriyeya Demokratîk (HSD) ragihand, helîkopter aîdî wan in û di nava wê de endamên Hêzên Antî-Teror (YAT) hebûn ku ji Rojava ji bo perwerdeyê çûne Silêmaniyê û helîkoptera din jî ji ber rewşa şert û mercên xerab ketiye xwarê.

Di daxuyaniyê de hate gotin, di her du helîkopteran de 9 şervanên di nav wan de Fermandarê Giştî yê Yacht Şervan Kobanî jî hebû jiyana xwe ji dest dane.

Fermandarê Giştî yê HSDê Mazlûm Abdî bi daxuyaniyekê li ser hesabê xwe yê Twîtterê wêneyên endamên YATê yên di ketina helîkopterê de jiyana xwe ji dest dan parve kir.

Hêzên Erka Operasyonên Taybet ên Hevbeş a hevpeymaniya navdewletî ya li dijî DAIŞê jî tweeta Ebdî parve kir û sersaxî ji HSDê re xwest.

Di daxuyaniyê de hat gotin, "Ji ber ku ew berdewamiya parastina ewlekarî û aramiyê li Sûriyê dikin, qurbanî û dilsoziya wan di xizmeta welatê xwe de nayên jibîrkirin."