PeyamaKurd – Hevserokê Giştî yê HDPê Mîthat Sancar diyar kir, nirxandina rast û jidil a encamên hilbijartinê wê hêzê bide wan û got, "HDP û Partiya Çep a Kesk wê vê pêvajoyê ji binî heta jor bimeşînin û çi pêwîst be dê bikin."

Hevserokên Partiya Çep a Keskan û HDPê ji bo nirxandina encamên hilbijartinê hatin cem hev.

Sancar di axaftina xwe ya li civîna li Navenda Giştî ya HDPê de eşkere kir, derbarê hilbijartinan û piştî wê de hevdîtinên nirxandinê berdewam dikin.

Sancar destnîşan kir, serdemeke dijwar li pey xwe hiştiye û wiha got:

“Em li ser hemû astan nîqaşan didomînin, da ku em vê serdemê bi hemû aliyên xwe ve binirxînin û nîqaş bikin û encamên pêwîst jê derxin. Civînên gel jî wê bidomin û di dawiyê de em ê bi konferans û piştre jî kongreyê vê pêvajoyê temam bikin. Di pêvajoya konferans û kongreyê de em ê daxwazên encamên ku me ji van nîqaşan derxistiye pêk bînin."

Sancar diyar kir, wan bi awayekî vekirî nîşan dane ku di civîn û daxuyaniyan de encamên ku ji hilbijartinê hêvî dikin bi dest nexistine û got, "Armancên me hebûn, em nekarîn bigihêjin van armancan. Di vî warî de gelek mijar hene ku divê bên çareserkirin pirs kirin."

Sancar diyar kir ku ji bo nirxandineke bi tendurist pêwîst e pêvajo bi hemû aliyên xwe ve were nirxandin û got, bila kes ji bîr neke ku hilbijartin di rewşeke bêedalet, newekhev û zordar de pêk hatin. Sancar got, nirxandineke weke ku pêvajoyeke hilbijartinê ya asayî derbas bibe nikare encamên rast derxe holê.

"Dema ku em di vê pêvajoyê de lêpirsînê dikin, em ji dil kêmasî û xeletiyên xwe nîqaş dikin. Ji ber ku ev rejîma bêdad û zordar bi hemû leza xwe berdewam dike û têkoşîn li benda serokên xwe ye. Ger em rola têkoşîn û rêbertiyê bigirin helbet. Divê em bibînin ku pêwîstiya me bi nûkirina xwe heye."

Sancar amaje bi wê yekê kir ku sererastkirina xeletiyan tenê bi nîqaşên vekirî, rexneyên ji dil û xwerexnekirina rast gengaz e û wiha got:

"Nirxandineke rast û samîmî wê hêzê bide me. Divê kes ji vê netirse, bila kes li hincetan negere ku xwe ji berpirsyariyê dûr bixe. HDP û Partiya Çep a Kesk wê vê pêvajoyê ji binî heta jor bimeşînin û çi ji destê wan bê wê bikin. Em li vir in, em diaxivin, em ê rexne bikin, em ê xwe rexne bikin, em ê berpirsyariyên xwe bi cih bînin."