image

پەیامی کورد        ...     بە هۆی هێرشێکی ئاسمانی سوپای ئیسرائیل ٨ کەسی هێزەکانی ئێران لە ناو خاکی سووریا کوژران

بە پێی هەواڵێک لە چاودێری مافی مرۆڤی سووریا دوێنێ هەینی ٧ ی مەی، لە ڕاپۆرتێکدا باسی لەوە کردووە کە لە هێرشی ئاسمانی ڕۆژی چوارشەممەی فڕۆکەکانی ئیسرائیل بۆ سەر پارێزگای ''لازقییە''، ٨ کەس لە هێزەکانی ڕێژیمی ئێران و میلیشیاکانی سەر بەو ڕێژیمە کوژراون.

چاودێری مافی مرۆڤی سووریا پێشتر ڕایگەیاندبوو کە لەو هێرشەدا دامەزراوەیەکی نیزامی کراوەتە ئامانج کە سەرەڕای ئەنباری چەک و تەقەمەنی، ١٤ کەس لە هێزەکانی ئێران و میلیشیاکانی سەر بەو ڕێژیمە و دوو کەسی مەدەنی بریندار بوونە.

''ڕامی عەبدولڕەحمان'' بەرپرسی مافی مرۆڤی سووریا ووتوویەتی: ''دواتر ڕوون کرایەوە کە بەهۆی ئەو هێرشەوە ٨ کەس کوژراون کە ٥ کەسیان لە هێزەکانی ئێران بوونە و ٣ کەسیان لە میلیشیاکانی سەر بە ڕێژیمە بوونە''.

تاکوو ئێستا ئێسرائیل لەوبارەوە هیچ هەڵوێستێکی نەبووە، بەڵام دەیان جار ڕایگەیاندووە کە ڕووبەڕووی هەوڵەکانی ڕێژیمی ئێران بۆ جێگربوونیان لە نزیک سنوورەکانی ئیسرائیل دەبێتەوە.