image

پەیامی کورد      ...    بە پێی بڕیاری پاریزگای هەولێر تووندترین ڕێکاربەرامبەر ئەو کەسانە دەگیرێتەبەر کە نرخ گران دەکەن

بەهۆی نزیکبوونەوەی مانگی ڕەمەزان نرخی کەل و پەل و پێداویستی خۆراک بەرەوهەڵکشانە و لیژنەکانی حکوومەتیش ڕاسپێردراون سزای سەرپێچیکاران بدەن بەهۆی گرانفرۆشییەوە.

ئومێد خۆشناو، پارێزگاری هەولێر لە لێدوانێکیدا ڕایگەیاند: "بۆ چاودێریکردنی بازاڕ و ڕێگەگرتن لەو کەسانەی بە قۆستنەوەی مانگی پیرۆزی ڕەمەزان یاری بە نرخ و پێداویستییەکانی هاووڵاتییان دەکەن، لەگەڵ لێژنەی هاوبەشی قائیمقامیەتی ناوەندی هەولێر کۆبوونەوەیەکمان کرد."

پارێزگاری هەولێر ڕوونی کردەوە: "لە کۆبوونەوەکەماندا تەئکیدیمان لە چاودێریکردنی چڕی بازاڕ و نرخی کەل و پەل و پێداویستییەکانی هاووڵاتییان کردەوە و لێژنەی هاوبەشی قائیمقامیەت بە سەرۆکایەتی قائیمقام ڕاسپێردرا تووندترین ڕێکارگەل لەگەڵ ئەو کەسانە بکەن کە مانگی پیرۆزی ڕەمەزان دەقۆزنەوە و نرخی خۆراک و پێداویستییەکان لەسەر هاووڵاتییان زیاد دەکەن.''

ئومێد خۆشناو ووتیشی: "ڕامانگەیاند نابێت ڕێگە بە هیچ کەسێک بدرێت یاری بە نرخی خۆراک و بازاڕ و پێداویستی هاووڵاتییان بکات."

نەوزاد کامل، بەڕێوەبەری گشتی بازرگانییش ڕایگەیاند: "ژمارەی لیژنەکانی چاودێری زیاد کراوە و خراونەتە نێو بازاڕ بۆ ئەوەی چاودێریی نرخی کەل و پەل بکەن لە بازاڕدا و هەرکەسێکیش نرخ بەرز بکاتەوە سزا دەدرێت."

نەوزاد کامل ووتیشی: "ڕۆژانە چەندین شوێن بەهۆی گرانفرۆشییەوە سزا دەدرێن، پێویستە هاووڵاتیانیش هاوکاری تیمەکانی چاودێریی بازرگانی بکەن و لە کاتی هەستکردن بە گرانفرۆشی پەیوەندی بە لایەنی پەیوەندیدار بکەن."