image


پەیامی کورد … حەوتووی داهاتوو سێیەم راپۆرتی چاكسازی رەوانەی پەرلەمان دەكرێت

سەعید هەركی جێگری سەرۆكی لیژنەی دەستپاكی لە پەرلەمانی كوردستان رایگەیاند، حكوومەت سێیەم راپۆرتی چاكسازی رەوانەی پەرلەمان دەكات و ئەمجارەش تەنها داتا و زانیاری نییە، بەڵكو رێكاریش گیراوەتە بەر و راپۆرتی ئەمجارە زۆر گرنگ دەبێت.

سەعید هەركی بە ماڵپەڕی فەرمی پارتی وتووە، حكومەت راپۆرتی خۆی لەبارەی چاكسازییەوە ئامادە دەكات و چاوەڕێ دەكرێت هەفتەی داهاتوو رەوانەی پەرلەمانی بكات، ئەمجارە راپۆرتەكە وردەكاریی زۆری تێدایە و وەكو دوو راپۆرتی پێشووتر نابێت، چونكە رێكاری پێویستیش گیراوەتە بەر، بەڵام لە دوو راپۆرتەكەی پێشوودا زیاتر باسی داتا و زانیاری كرابوو.

جێگری سەرۆكی لیژنەی دەستپاكی وتوشیەتی، فشاریان نەخستە سەر حكومەت چونكە رێكارەكانی لە بواری چاكسازیدا گرتووەتە بەر، بۆیە ناوەڕۆكی راپۆرتەكە بۆ ئەوان گرنگە چونكە كاتی ئەوە هاتووە رێكار بگیرێتە بەر لە چاكسازیەكان و تەنها داتا و زانیاری نەبێت.

جەختی لەوەش كردووەتەوە، پرۆژەی چاكسازی بۆ دوو مانگ و سێ مانگ و ساڵێك نابێت، بەڵكو پرۆژەیەكی ستراتیژییە و بۆ كابینەكانی داهاتووش بەردەوام دەبێت.