image


پەیامی کورد... لە چۆمان ٣٥٠ پارچە تەقەمەنی لەناو برا

دەزگای گشتی کاروباری مین بە سەدان پارچە تەقەمەنی جەنگی لە قەزای چۆمان لەناو برد.

بەگوێرەی ڕاگەیەنراوێکی بەڕێوەبەرایەتی گشتی کاروباری مینی هەولێر بڵاوی کردووەتەوە، لە چیای بەردە بووک لە سنووری قەزای چۆمان بە سەدان مین و پارچە تەقەمەنی جەنگی بەسەرکەوتویی لە ناوبراون.

لەوبارەیەشەوە جەبار مستەفا سەرۆکی دەزگای گشتی مین لە لێدوانێکی ڕۆژنامەوانیدا ڕایگەیاند: زیاتر لە ٣٥٠ پارچە تەقەمەنی جەنگی جۆراو جۆر لەلایەن تیمی لە ناوبردنی تەقەمەنی نەتەقاوە سەر بە بەڕێوەبەرایەتییەکەیان بەسەرکەوتویی لە ناوبراون.

جێی ئاماژەیە لە سنووری ئیدارەی سەربەخۆی سۆران ڕووبەرێکی بەرفراوان بە مین و پاشماوەی جەنگی هەن، بۆیە لە ئەنجامی کاری ڕۆژانەی تیمەکان بەشێک لەو پاشماوە جەنگیانە دوای کۆکردنەوەیان لە شوێنی سەلامەت لە ناو دەبرێن.