image


پەیامی کورد … وەزارەتی تەندروستی: رێوشوێنی زیاتر بۆ جێبەجێکردنی رێکارەکانی خۆپارێزی دەگرینەبەر

 

وەزارەتی تەندروستی حکومەتی هەرێم رایگەیاندوە: ئامادەکاری زیاتر دەکات بۆ بەرەنگاربوونەوی شەپۆڵێکی نوێ و هەڵکشانێکی بەرزی تەشەنەکردنی پەتای ڤایرۆسی کۆڕۆنا، لەوانە فراوانکردنی پشکنین و توندترکردنی چاودێری لە دەروازە سنورییەکان و فرۆکەخانەکان.

 

 لە نوسراوێکی وەزارەتی تەندروستی حکومەتی هەرێمدا، کە ئاراستەی سەرجەم بەڕێوەبەرایەتیەکانی تەندروستی لە پارێزگا و ئیدارەکان کراوە، هاتووە، دوای هەڵسەنگاندنی بارودۆخی نەخۆشی کۆڕۆنا و پڕۆسەی ڤاکسین و ڕێکارەکانی خۆپارێزی و چارەسەری، بڕیاردرا بە گرتنەبەری ڕێوشوێنی زیاتر بۆ جێبەجێکردنی ڕێکارەکانی پەتازانی و خۆپارێزی و هۆشیاری و دەستنیشانکردن و چارەسەرکردن.

 

بەپێی نوسراوەکە، بڕی زیاتر لە کەلوپەلی خۆپارێزی کەسیی و پاکژکەرەوە دابین دەکات و چاودێری لە خاڵە سنوریەکان و فڕۆکەخانەکان بە مەبەستی رێگری لە هاتنە ناوەوەی زنجیرە نوێکانی کۆرۆنا زیاتر دەکرێت.

هەروەک ئاماژە بەوەشدراوە، هەڵمەتەکانی وشیارکردنەوەی هاووڵاتیان فراوانتر دەکرێن و لە پێناو زووتر ناسینەوەی حاڵەتەکانی تووشبوون و دەستنیشانکردنی زنجیرە نوێکانی کۆرۆنا، توانای ناوەندە تەندروستییەکان بەهێزتر دەکرێت.

 

هەر بە گوێرەی بڕیارەکانی وەزارەتی تەندروستی، سەرجەم پزیشکان و کارمەندانی تەندروستی لە پزیشکی منداڵان، ژنان، نەشتەرگەری، شکان و پێست ئامادە دەکرێن بۆ ئەوەی بەشداربن لە هەموو بەشەکان و بۆ چاودێری نەخۆشە سوکەکان، هەروەها پزشکان هەناو و هەناسەش ئامادەبکرێن بۆ ئەوەی وەک پزیشکی چاودێری چڕ خزمەت بکەن".