image

پەیامی کورد      ...   کونسووڵخانەی ئەمریکا لە هەولێر پێشوازی لە پاڵپشتی و پشتیوانی کارێکی حکوومەتی هەرێمی کوردستان دەکات

کونسووڵخانەی ئەمریکا لەهەولێر رایگەیاند، پێشوازی پاڵپشتی تەواوی حکوومەتی ھەرێم دەکەن بۆ ئازادی ڕۆژنامەگەری و ڕێزگرتن لەو کارە گرنگانەی کە دیپلۆماتکاران دەیکەن لەگەڵ کۆمەڵگەی مەدەنی و خەڵکی تر  بۆ پاڵپشتیکردنی مافەکانی مرۆڤ و سەروەریی یاسا.

لەپێگەی تایبەتی خۆی لەتۆڕی کۆمەڵایەتی فەیسبووک، دوانیوەڕۆی ئەمڕۆ دووشەممە کونسووڵخانەی ئەمریکا لەهەولێر پۆستێکی لەبارەی ئازادی رۆژنامەگەری لەهەرێمی کوردستان بڵاوکردەوە و رایگەیاند، پێشوازی پاڵپشتی تەواوی حکومەتی ھەرێم دەکەین بۆ ئازادی ڕۆژنامەگەری و ڕێزگرتن لەو کارە گرنگانەی کە دیپلۆماتکاران دەیکەن لەگەڵ کۆمەڵگەی مەدەنی و خەڵکی تر  بۆ پاڵپشتیکردنی مافەکانی مرۆڤ و سەروەریی یاسا.

کونسووڵخانەی ئەمریکا لەهەولێر وتووشیەتی پێشوازی لەو هەڵوێستەی دیکەی حکوومەتی هەرێمی کوردستان دەکەین کە تێیدا جەخت لەوە دەکەنەوە،"ڕوونکردنەوەی حکوومەتی ھەرێم کە کۆبوونەوە لەگەڵ دیپلۆماتکاران تاوان نییە."  

ئەمە لەکاتێکدایە، ئێوارەی دوێنێ یەکشەممە مەسروور بارزانی سەرۆکی حکوومەتی هەرێمی کوردستان ، پێشوازی لە شاندێکی باڵای ئەمریکی کرد کە پێکهاتبوو لە جۆوی هوود یاریدەدەری وەزیری دەرەوە بۆ کاروباری ڕۆژهەڵاتی نزیک به‌وه‌كاله‌ت، ئەیمی کەترۆنا نوێنەری تایبەتی ئەمەریکا بۆ سوریا بەوەکالەت، زەهرا بێل بەڕێوبەری کاروباری سوریا و عێراق لە ئەنجومەنی ئاسایشی نیشتمانیی ئەمریکا.
 
بەگوێرەی زانیارییەکان، یەکێک لەتەوەرەکانی ئەو کۆبوونەوەیە پرسی ئازادی رادەربڕین و دەستگیرکراوانی بادینان بوە و سەرۆکی حکوومەت وتوویەتی،" ئەوە بابەتێکی یاساییە و لەو چوارچێوەیەدا هەڵسوکەوتی لەگەڵ دەکرێت"، پشتیوانی و ڕێز و پێزانینی خۆشی بۆ کاری دیپلومات و نێردە دیپلوماسییەکان لە هەرێمی کوردستان دەربڕیوە.

راگەێندراوی سەرۆکایەتی حکوومەت باسی هەڵوێستی شاندەکەی نەکردوە لەوبارەیەوە، بەڵام ئاماژەی بەوە کردوە، مەسروور بارزانی جەختی کردۆتەوە کە "ڕەفتارە نایاساییەکانی حوکمدراوان و خراپ بەکارهێنانی پەیوەندییەکانیان، بە هیچ شێوەیەک گومان لە سەر لایەنە دیپلوماسیيەکان درووست ناکات. حکوومەتی هەرێمی کوردستان، کاری دیپلوماتکارانی ناو هەرێمی کوردستان، بەرز دەنرخێنێت و هەموو ئاسانکارییەکی پێویستیان پێشکەش دەکات.،

هاوکات، هەردوولا پشتیوانی خۆیان بۆ ئازادی کاری ڕاگەیاندن و ئازادی ڕادەربڕین و ڕێزگرتن لە مافەکانی مرۆڤ و کاری ڕێکخراوەکانی کۆمەڵگەی مەدەنی دەربڕی.