image

پەیامی کورد      ...    ڕوونکردنەوەیەكی گرینگ لە وەزارەتی تەندرووستی حکوومەتی هەرێمی کوردستان ەوە بۆ ڕای گشتی 

لە دوێنێ شەوەوە ڤیدیۆیەك بڵاوبووەتەوە گوایە سندووقێکی ڤاکسین جۆری فایزەر دزەی کردووە بۆ یەکێک لە ووڵاتان ، بەپێویستی دەزانین بۆ ڕای گشتی و هاووڵاتیان و دام و دەزگاکانی ڕاگەیاندن ڕوون بکەینەوە کەوا ئەم ڤیدیۆیە درووستکراوە و هیچ پەیوەندییەکی بە هەرێمی کوردستانەوە نیە وە بەناوی کەناڵی BBC بە مۆرێکی ساختەی بەناو وەزارەتی تەندرووستی هەرێمی کوردستان پێشان دەدرێت.

دەستبەجێ لەلایەن تیمی سەرپەرشتیاران لە وەزارەتمان دەستیان بە لێکۆڵینەوەی سەرەتایی کرد بەهەماهەنگی و پەیوەندی لەگەڵ وەزارەتی تەندرووستی عێراقی فیدڕال و چاودێریکردنی هەردوو بەڕێزان وەزیری تەندرووستی عێراق و هەرێمی کوردستان و نوێنەری کۆمپانیای بەرهەم هێنەری ڤاکسینی (ڤایزەر) کە دەرەنجامی سەرەتایی دەرچوو هیچ ئەسڵ و ئەساسی نیە بەڵکوو ئەم ڕاستیانەی خوارەوە دەخەینە ڕوو:

1.   هیچ فۆرم و مۆرێکی تەندرووستی هەرێم لەسەر ڤاکسینەکانی ڤایزەر بەکارنایەت چوونکە ڕاستەوخۆ ڤاکسینەکە بۆ هەرێمی کوردستان دابین نەکراوە بەڵکوو تەنها لەڕێگەی وەزارەتی تەندرووستی عێراقی فیدڕاڵ بۆیە ئەو کارت و مۆر و فۆڕمە هیچ سەرچاوەیەکی ڕاستی و دروستی نیە.

2.   جۆرەکانی ئامێری چاودێریکردن و پارامیتەری سەر سندوقەکە و زانیاریەکان تەواو جیاوازە و هاوشێوەی ئەو جۆرە نیە کە لە هەرێمی کوردستان وەرگیراوە.

3.   نوێنەری کۆمپانیای ناوبراو لەگەڵ هەموو سندۆقێك لەکاتی گواستنەوە ئامادە دەبن تا دەگاتە سەنتەری بەکارهێنان وە بۆ هەر گواستنەوەیەک بە سیستەمی چاودێریکردنی کۆمپانیا لە سەنتەری سەرەکیەوە ئاگادار دەبێت.

بۆیە دڵنیاتان دەکەینەوە کەوا تا ئێستا ٩ سندوق لە ٨ سەنتەری ڤاکسین لە هەرێمی کوردستان وەرگیراوە، کە هەر هەموویان جێگا و ڕێگای دابەشکردنی ڕوونە بەتەواوی داتا و زانیاری و چۆنیەتی دابەشکردن تۆمارکراوە بەسیستەمی مەرکەزی لەگەڵ بەغداد بەستراوە.

لە کۆتاییدا نیگەرانیمان لەوەیە کە هەوڵی تێکدان و درووستکردنی دڵەڕاوکێ لەنێو هاووڵاتیان تەنها بەمەبەستی ئاژاوە و لەکەدارکردنی ئەم پڕۆسە پیرۆزەیە بە مەرامی تێکدانی سیستەمی ناردنی ڤاکسین و دابەشکردنە لە هەرێمی کوردستان بە ڕادەیەک ئامانج تیایدا نەناردنی ئەم خزمەتگوزاریە مرۆییەیە بۆ هاووڵاتیان.

دووپاتیی دەکەینەوە لێکۆڵێنەوە و بەدواداچوونمان بەردەوام دەبێت بۆ گەیشتن بە هۆکار و سەرچاوەی درووستکردنی ئەم ئاژاوەگێڕیە و لەهەر دەرەنجامێکی دیکەدا ڕای گشتی لێ ئاگادار دەکەینەوە.

وەزارەتی تەندرووستی
حکوومەتی هەرێمی کوردستان
21 نیسان 2021