image



پەیامی کورد... رۆژی شەممە لە هەولێر گردبوونەوەی ناڕەزایی دژی كوشتنی ژینا ئەمینی دەكرێ


بڕیارە ڕۆژی شەممە 24ی ئەیلوولی 2022، لە بەردەم بارەگای نەتەوە یەكگرتووەكان لە شاری هەولێر، گردبوونەوەیەكی ناڕەزایی بەڕێوە بچێت.

سیروان گه‌ردی، یه‌كێك له‌ رێكخه‌رانی گردبوونه‌وه‌یه‌كه‌ راگه‌یاند: “بریاره‌ كاتژمێر 10ی بەیانیی ڕۆژی شەممە، لە بەردەم بارەگای نەتەوە یەكگرتووەكان، چالاكوان و رۆژنامه‌نووسان و خەڵكی هەرێمی كوردستان و رۆژهه‌ڵاتی كوردستان یاداشتێكی ناڕەزایی به‌رز بكه‌ینه‌وه‌ بۆ به‌رده‌م نه‌ته‌وه‌ یه‌كگرتووه‌كان و تێیدا باسی پێشێلكاری بەرامبەر بە مافەكانی مرۆڤ و مافەكانی ئافرەتان بكەن”.

هاوكات جەختی كردەوە كە لەو گردبوونەوەیەدا داوا لە ڕێكخراوی نەتەوە یەكگرتووەكان دەكەن، هەوڵەكانی بخاتە گەڕ بۆ كۆتاییهێنان بەو زوڵمەی لە بەرامبەر بە ژنان دەكرێت.

ئەوەشی خستەڕوو، بۆ ئامادەكارییەكانی گردبوونەوەكە و تۆماركردنی ئەو كەس و لایەن و ڕێكخراوانەی كە دەیانەوێت ناو یان نوێنەرایەتییان لە گردبوونەوەكەدا هەبێت، دەستەیەكی ئامادەكاریان پێكهێناوە كە ڕۆژنامەنووسێك بە ناوی (كارزان سەباح هەورامی) سەرپەرشتی دەكات و لە ئێستاوە ئامادەكارییەكانیان بۆ گردبوونەوەكە دەست پێكردووە.

هەر لەمبارەیەوە ئومێد خۆشناو، پارێزگاری هەولێر بە (باسنیوز)ی راگەیاند: ”ژمارەیەک لە رێکخراوەکان داوای مۆڵەتیان کرد، بۆ ئەوەی رۆژی شەممەی داهاتوو لە پێش رێكخراوی نەتەوە یەكگرتووەكان ناڕەزایی دەرببڕن، ئێمەش لە چوارچێوەی یاسای خۆپیشاندان، مۆڵەتمان پێ داون“.

پاش تاوانی كوشتنی ژینا ئەمینی، كچە كوردی خەڵكی شاری سەقز كە لە لایەن پۆلیسی ئێران لە شاری تارانی پایتەختی ئەو وڵاتە بە پاساوی جلوبەرگەكەی دەستگیر كرابوو، پاشان گیان لەدەستدانی راگەیاندرا و كەسوكارەكەشی گوتیان كە كچەكەیان لە ئەنجامی ئەشكەنجەی هێزە ئەمنییەكانی ئێران گیانی لەدەست داوە. خۆپیشاندان لە زۆربەی شار و شارۆچكەكەی ئێران بە گشتی و ڕۆژهەڵاتی كوردستان بە تایبەتی دەستی پێكرد، بەڵام لە لایەن هێزە ئەمنییەكانی ئێران، بە تایبەتیش لە ڕۆژهەڵاتی كوردستان، لە چەندین شوێن بە بەكارهێنانی هێز هەوڵی كۆتاییهێنان بە خۆپیشاندانەكان دراوە كە بەهۆیەوە باس لە كوژرانی دەیان كەس و برینداربوونی سەدانی دیكە دەكرێ.