image

پەیامی کورد     ...  زیاتر لە ٣٠٪ کاندیدە دەرچووەکانی کورد " ژنن "

 ٢٣ ژن لەسەر حسابی هێزە کوردیەکان دەچنە ئەنجوومەنی نوێنەران و بەشێکی زۆریش لەو ژنانە سیستەمی کۆتایان تێپەڕ کردووە  لە هەندێک بازنەشدا ژنان بە سیستەمی کۆتا دەرچوون.

بەگوێرەی زانیەریە بڵاوکراوەکانی کۆمیسیۆنی باڵای هەڵبژاردنەکانی عێراق کە وەک ئەنجامی بەرایی بڵاویکردووەتەوە  تە ئێستا لە شاری سلێمانی ٧ ژن سەرکەوتوون بۆ پەرلەمانی عێراق لە کاتێکدا پارێزگاکە پێنج بازنەی هەیە بەڵام ٧ ژن دەرچوون.

لە پارێزگای سلێمانی لە کۆی ١٦ ئەندام پەرلەمان ٧یان ژن دەرچوون کە سەرجەمیشیان بە دەنگی خۆیان دەرچون و هیچ کەسێکیان پشتیان بە سیستەمی کۆتا نەبەستووە.

لە ریزبەندی دووەمدا پارێزگای هەولێر دێت کە زۆرترین ژن دەنێرێتە ئەنجومەنی نوێنەران و شەش کەس تا ئێستا دەرچوون کە پارێزگاکە پێکهاتووە لە چوار بازنە.

لەدوو بازنەی شارەکەدا بە هۆی تووندی رکابەری دوو ژن بە سیستەمی کۆتا دەرچوون کە یەکیان شوێنی فەیسەڵ کەریم خان برادۆستی گرتووەتەوە کە جوان عەبدۆڵڵا یە و یەکێکی دیکەشیان شوێنی عەبدۆلستار مەجیدی گرتووەتەوە کە نەهلە قادرە.

لە پارێزگای دهۆک دەنگی ژنان لە هەر سێ بازنەکەدا بەشێوەیەکی بەرچاو بووە، کە تواندراوە چوار ژن سەربکەون، ئەڤین سەلیم کاندیدی پارتییە و بەهۆی ڕکابەری توندی کاندیدی یەکگرتوو بە سیستەمی کۆتا دەرچووە و شوێنی فەهمی سەلمانی گرتووەتەوە، لە بازنەی دووی ئەو پارێزگایە زۆزان عەلی کاندیدی پارتی بووە بە سیستەمی کۆتا شوێنی عەبدۆلواحید ئەحمەد ڕەشیدی گرتووەتەوە، لە بازنەی سێدا دوو کاندید دەرچوون هەردووکیان بە دەنگی خۆیان دەرچوون و پێویستیان بە سیستەمی کۆتا نەبووە.

لە شاری کەرکوک دوو کاندیدی ژن دەرچوون کە هەریەکەیان کاندیدی یەکێتی و پارتین و لە شاری نەینەواش یەکێتی دوو کاندیدی ژن دەرچووە و پارتیش یەک کاندیدی ژن دەرچووە، ئەوە جگە لە سنووری دیالە کاندیدێکی یەکێتی بە توانانی خۆی دەرچووە.

لە کۆی ٦٣ دەرچووی هێزە کوردیەکان کە تا ئێستا لەسەر ئاستی عێراق یەکلایی بووەتەوە ٢٣ ژن دەرچوون کە ئەوەش یەکەمجارە پەرلەمانتارانی ژن بەو رێژە فراوانە لە ناو هێزە کوردیەکاندا دەربچن هۆکارەکەشی بۆ گۆڕینی سیستەمی هەڵبژاردنە.

ناو و ژمارەی دەنگی ئەو ژنانەی لەسەر لیستە کوردیەکان دەبنە پەرلەمانتار بە گوێرەی ئەنجامە بەراییەکان:
 
▪️هەولێر (6)
جوان عەبدوڵا پەدەکە 9174
وەزیرە ئەحمەد نەوەی نوێ 18459
کوردۆ عومەر یەکێتی 13846
ڤیان عەبدولعەزیز نەوەی نوێ 11063
لەیلا ئەکرەم سەعید پارتی 7078
نەهلە قادر پارتی 9995
 
▪️دهۆک (4)
ئەڤین سەلیم پارتی 15506
زۆزان عەلی پارتی 16590
ئیمان عەبدولرەزاق یەکیتی 14164
ڤیان سەبری پارتی 13867
 
▪️سلێمانی(7)
یادگار مەحمود پارتی 6069
نەرمین مەعروف یەکێتی 5862
بەدریە ئیبراهیم نەوەی نوێ 19098
چرۆ حەمەشەریف یەکێتی 12254
سروە عەبدولواحید نەوەی نوێ 22634
بەدریە حوسێن عەزیز یەکێتی13456
سروە محەممەد رەشید یەکێتی 5452 دەنگ
 
▪️کەرکوک (2)
نەجوا حەمید، پارتی 10018
دیلان غەفوور یەکێتی 18173
 
▪️ نەینەوا (3)
ئەحلام رەمەزان یەکێتی 4910
رۆنزێ زیاد یەکێتی 5840
ڤیان دەخیل پارتی 9294
 
▪️دیالە (1)
سۆزان مەنسور یەکێتی 16175